Раководство
ДИРЕКТОР
Проф. д-р Наташа Котлар-Трајкова е редовен професор во ЈНУ Институт за национална историја – Скопје.
Дипломирала во 1991 г. со одличен успех на Филозофскиот факултет – група Историја, при Универзитетот „Св. Кирил и Методиј“ во Скопје. Во 1993 г. се вработила во Институтот за национална историја, каде што магистрирала и докторирала.
Таа е автор на неколку монографии и на повеќе научни трудови, а настапувала и на голем број научни собири и конференции во земјата и во странство. Нејзиниот научен интерес е насочен кон проучување на македонското прашање и македонското национално движење во XIX век и на почетокот на XX век, а специјалност ѝ е новата бугарска историја.
Проф. д-р Наташа Котлар-Трајкова била претседател на Здружението на историчари на Република Македонија во два мандати. Активна е во јавниот и општествениот дискурс. Се појавува и во улога на промотор на нови изданија и како рецензент на новосоздаден труд од областа на нововековната историја. Честопати пишува текстови со историска содржина за научно-документарни филмови, но и колумни во печатените и електронските медиуми. Како историчар, таа е автор и чест гостин на телевизиски и на радиоемисии за актуелни или пригодни историски настани, поводи и јубилеи. Говори англиски јазик, а се служи со италијански, германски, руски, албански, бугарски и со други јужнословенски јазици.
ЗАМЕНИК ДИРЕКТОР
М-р Димитар Богески e роден на 21 април 1981 година, во Скопје. Додипломски и постдипломски студии завршил на Институтот за историја при Филозофскиот факултет, при што ја одбранил магистерската теза „Дејноста на ВМРО во Вардарска Македонија 1919-1934 г.“.
Во Државниот архив засновал работен однос во 2008 година при што од 2010 до 2015 г. бил раководител на Одделението на Државниот архив – Скопје, од 2015 до 2017 г. бил в.д. државен советник во Државен архив – централен дел, и од 2017 г. раководител на Одделение во Државен архив – централен дел.
М-р Димитар Богески бил и советник во Советот на Општина Центар во периодот од 2005 до 2009 г., и претседател на Одборот за подигање споменици и спомен-обележја (Воин на коњ, Св. Кирил и Методиј, Св. Климент и Наум, Карпош). Како советник бил претседател и на Комисијата за култура при Советот.
Бил учесник на меѓународни архивистички форуми и конференции, како „Conferenca of Archives in the Slavic countries“, учествувал на настани во организација на International Foundation „Forum of Slavic Countries“; „International Institute for Archival Science“ IIAS; „IIAS Autumn Archival School“.
Учествувал во повеќе проекти и иницијативи на невладини организации, како обука за политичко лидерство, политички менаџмент и водење кампањи во организација на ИРИ, активности во однос на општински училишта и градинки во општина Центар како проект на УСАИД. Се стекнал со сертификат за односи со јавност и медиуми од НДЦ, посетувал семинари, обуки и предавања на фондацијата „Конрад Аденауер“, учествувал во проекти поврзани со локален економски развој преку ЗЕЛС, Општина Центар и УНДП.
Говори англиски јазик и словенски јазици од Балканот.
Стручно-научни трудови:
– „Архивот на Скопје 1952 – 2012 – ЗАПИСИ“, Годишњак историског архива Пожаревац, год. 1 бр. 1, 2012 година.
– „Проблемот на рационализација и валоризација во некои сфери на архивската дејност“ ЗАПИСИ , Годишњак историског архива Пожаревац, год. 2, бр. 2, 2013 година. – „Монографија за архивот на град Скопје“ со изложба во Париз, под покровителство на УНЕСКО.