На 21 мај 2025 година, тим од Државниот архив предводен од директорката, проф. д-р Наташа Котлар-Трајкова, учествуваше на отворање на изложба на авторот, професор Каталин Д. Константин, насловена како „Beyond yesterday“. Професорот Константин е антрополог од Универзитетот во Букурешт.
Изложбата е настаната како резултат на истражувачката мисија на професорот Константин низ селата на Балканот, притоа следејќи ги истражувачките патеки на браќата Манаки. Во изложбата беа вметнати и фотографии од фондот „Браќа Манаки“, кој се наоѓа во Државниот архив-Одделение Битола.
Концептуално, изложбата е изведена како спој помеѓу минатото и сегашноста и го обработува развојот на дел од селата фотографирани од браќата Манаки, правејќи паралела на панорамски фотографии направени во периодот пред 1905 година (главно во влашките села во ентогеографска Македонија, Епир и Албанија) и нивниот изглед и развој денес. На отворањето професорот Константин ја презентираше заложбата и улогата на Државниот архив во овој проект, а директорката Котлар-Трајкова и архивистите м-р Гоце Стојановски и Димитар Ѓоргиевски го истакнаа придонесот на архивите во ваков тип на соработки и потребата за нивно презентирање кон пошироката јавност.
Тимот од Државниот архив оствари повеќе средби со официјални лица при посетата на Букурешт, и тоа од Архивот при Музејот на селото, Културниот институт на Романија. Претставниците на Државниот архив присуствуваа и се вклучија на предавање за студентите од Универзитетот на Букурешт на тема „Архив и фотографско наследство на браќата Манаки во контекст на социјално-културните процеси на Балканот во периодот пред Балканските војни“.
Работната посета на Романија отвори перспективи за идна соработка со цел презентирање заедничко културно наследство во иднина.
