NOVOto-LOGO

Изложбата „Македонија во Првата светска војна“ отворена во Воениот музеј во Стокхолм – Шведска (25 ноември 2015 година)

Во рамките на соработката на Државниот архив на Република Македонија со Воениот музеј во Стокхолм, Кралство Шведска, Државниот архив на Република Македонија подготви изложба насловена „Македонија и Првата светска војна“, која се отвори на 25 ноември 2015 година во 15:00 часот во Воениот музеј во Стокхолм.

На отворањето на изложбата свое обраќање имаа г-ѓа Александра Наќева Ружин, амбасадор на Република Македонија во Кралството Шведска и г-ѓа Ева-Софи Ернстел, директор на Воениот музеј во Стокхолм, а предавања за балканските пропаганди и последиците од нив за Македонија до 1918 година одржаа д-р Филип Петровски, директор на Државниот архив на Република Македонија и д-р Александар Стојчев, директор на Воениот музеј на Република Македонија.

Оваа изложба е дел од проектот на Воениот музеј во Стокхолм почнат уште во 2014 година по повод одбележувањето на 100-годишнината од почетокот на Првата светска војна.

Во рамките на тој проект Воениот музеј во Стокхолм досега ги претстави изложбите на Австрија, Холандија и Србија, а во моментот се во подготовка изложбите на Русија, Белорусија и Чешка. Планирано е изложбите на оваа тема да се одржуваат и во текот на наредните три години како симболика на траењето на Војната.

Изложбата „Македонија и Првата светска војна“ ќе биде презентирана до февруари 2016 година, а целта е преку неа да се претстават политичките, културните и економските состојби во Македонија во периодот на Првата светска војна, настаните што му претходеле на тој период како и учеството на македонскиот народ во војната.

Со оваа изложба Државниот архив на Република Македонија се вклучува во одбележувањето на 100-годишнината од Првата светска војна преку презентирање на архивските документи што се чуваат во депоата на Архивите во Македонија.

Најнови објави

Движете нагоре