Државниот архив на Македонијa на 9 декември 2015 година, во 20 часот, во просториите на иновативниот центар на „Т-home“ на плоштадот „Македонија“, ја отвори изложбата под наслов „Одбележување на стогодишнината од распарчувањето на Македонија и од Првата светска војна“. На отворањето на изложбата на оригинални фотографии и документи, чиј избор е направен од депоата на Државниот архив, говореа директорот д-р Филип Петровски и една од авторите Дора Јурукова.
„Изложбата опфаќа фотографии, документи и материјали од богатата ризница на Државниот архив на Р. Македонија. Целта е да се прикажат помалку познати материјали, со кои јавноста ќе добие барем мала претстава за тоа каква била ситуацијата во Македонија во почетокот на 20 век и какво било секојдневието на нашите предци-Македонци“,истакна д-р Филип Петровски .
„Со оваа изложба ја прикажуваме ситуацијата во Македонија, предизвикана пред сè од поделбата на нејзината територија меѓу соседните држави, а потоа втурната во нова братоубиствена војна на линијата на Македонскиот фронт“, се вели во освртот на авторите на изложбата.
