Државниот архив со Дирекцијата на државните архиви при Претседателството на Република Турција и Турската канцеларија за развој и соработка остварува долгогодишна успешна соработка, која дава видливи резултати и бенефити за институцијата во исполнувањето на стратешките цели. Како потврда на интензивната соработка, денес во посета на Државниот архив беа потпретседателот на Турската агенција за соработка и координација ТИКА од Република Турција, д-р Махмут Чевик, и програмскиот директор на ТИКА во Скопје, Халим Омер Согут, при што остварија работна средба со директорот на Државниот архив, д-р Емил Крстески.
Присутните на средбата разговараа за подобрените услови за работа во Одделението за средување и обработка на архивски материјал – османлиски период, благодарејќи на поддршката на ТИКА со чија помош беше адаптиран ентериерот во просториите и тие беа опремени со мебел и технички средства. Директорот д-р Емил Крстески искажа посебна благодарност и истакна дека со осовременување и подобрување на условите за работа во Одделението се создале солидни услови за работа на стручниот кадар што ќе влијае на постигањата во научноистражувачката работа. Тоа неминовно ќе доведе осознавање нови факти за македонската национална историја во дадениот период.
Двете страни на работната средба се согласија дека се отвораат нови перспективи за соработка во делот на развивање на архивската дејност и пренесувањето искуства. Културно-историското наследство е еден од мостовите што и во иднина ќе ги поврзува двете земји и нивните народи. Д-р Емил Крстески на гостите од Република Турција им подари копии од фермани кои Државниот архив ги поседува.
Во рамки на посетата беше свечено отворен и Центарот за дигитализација кој исто така беше и ставен во функција со поддршка од Тика.
