Излезе од печат новиот двоброј на меѓународното списание „Македонски архивист“ бр. 33-34 во издание на Државниот архив за кое авторите покажаа огромен интерес за објавување текстови. Анализа на историски извори, сеќавања за настани од историското минато, претставување на архивските фондови, скопскиот земјотрес од 1963 година низ архивските материјали, архивската едукација со ученици и студенти, странски искуства во архивското работење, историја на секојдневниот живот на македонската заедница во Австралија се дел од содржините на списанието со 280 страници, кое го прават прифатливо за љубителите на културно-историското минато, учениците од средното образование, студентите по општествено-хуманистички науки и воопшто истражувачите.
Авторите на статиите се докажани експерти во своите области, а во квалитетот на статиите придонесоа рецензентите и членовите на меѓународниот редакциски одбор. Списанието изобилува со фотографии и документи кои на читателот му ја доближуваат содржината, во прилог е дадена и хрониката на настаните кои ги организирал Архивот во 2023 година.
За Државниот архив претставува привилегија што ги обединува експертите од областа на архивистиката и историјата кои доаѓаат од различни институции со тоа што дава можност да ги истакнат своите сознанија пред стручната и поширока јавност така што го публикува списанието „Македонски архивист“, кое е единствено во државата од овој вид.
