arhiv tefter vnatresni.cdr

Државниот архив прослави 70 години од своето постоење

По повод 70 години од основањето на Државен архив, денеска во Скопје беше одржана свечена академија, под покровителство на премиерот на државата, г-дин Зоран Заев, кој им се обрати на учесниците.  На свечениот собир беа присутни и Претседателот, Стево Пендаровски, Архиепископот г.г. Стефан, пратеници, министри, градоначалникот на Скопје, амбасадори, историчари и експерти.  

На свечениот скромен, но достоен и достоинствен собир по повод јубилејот, беше промовирана монографијата: „Печат на времето – 70 години Државен архив (1951-2021)“, во која е презентиран историскиот развој на Државниот архив преку фотографии и документи за најзначајните настани со кои располага Архивот, како и зборникот: „Првите луѓе на Државниот архив (1951-2021)“. 

 По завршувањето на официјалниот дел на настанот, гостите имаа можност да ја видат изложбата: „Скопската градска општина“, посветена на градоначалниците на Скопје од 1945 година до денес, а им беа доделени и благодарници на 20 вработени или пензионирани лица, кои дале значаен придонес во работата на Државниот архив. 

Премиерот Заев во обраќањето го потенцира значењето на Државниот архив како значајна историска, научна и културна институција, која е чувар на нашата историја, култура, јазик и традиција, што се еден од главните столбови на нашиот национален идентитет. 

Во своето излагање директорот на Државниот архив д-р Емил Крстески изјави дека  Државниот архив во изминатите 70 години се гради како значајна државна институција, и дека тој е трезор на оригинални документи, писма, фотографии и други материјали од познати револуционери, илинденци, просветители и писатели, уметници, општествени дејци, како и документи од најзначајните политичко-историски процеси, настани и личности за нашата земја. 

„Во сите изминати години очигледен е постојаниот раст на Државниот архив, кој добива свој европски лик со прифаќањето на европските начела и прописи што се однесуваат на архивистиката и кои се вметнати во новиот Закон за архивска дејност, како и со спроведувањето на процесот на дигитализацијата на историските документи и материјали“ – нагласи директорот на Државниот архив д-р Емил Крстески.

Најнови објави

Движете нагоре