Директорот на Државниот архив и официјален претставник на нашата Влада во процесот на сукцесија на архивските документи од поранешна Југославија, д-р Емил Крстески, во Белград имаше работна средба и разговор со директорот на Архивот на Југославија, д-р Милан Терзиќ за натамошните активности кои што би придонесле за напредок и забрзување на овој процес. Меѓу другото, беше прифатен предлогот пошироко да се разгледа процесот на дигитализација на целосни фондови и во него да бидат вклучени и другите земји-сукцесори од поранешна СФРЈ, па потоа да се пристапи кон меѓусебна размена, со што за краток временски период би се овозможило да се дојде до многу поголем и значаен материјал.
Во разговорот обострано беше потенцирана потребата од забрзување на процесот на сукцесија на архивскиот материјал од периодот 1945-1991 година што се наоѓа во овој Архив и кој се однесува на Македонија. Директорот на Архивот на Југославија, д-р Милан Терзиќ ја потенцира отвореноста на овој Архив за непречена соработка, а директорот на Државниот архив, д-р Емил Крстески најави скорешна посета на Белград на стручни лица заради преземање на архивскиот материјал во согласност со Договорот за сукцесија. На средбата беше констатирана потребата и од продлабочување на меѓусебната соработка преку размена и презентирање на изложби и на други проекти.
