Me ftesë të Agjencisë Shtetërore të Arkivave të Kosovës, sot në Prishtinë të Republikës së Kosovës është hapur dhe promovuar në Muzeun Kombëtar të Kosovës ekspozita “Misionarja e Bamirësisë – Kujtimet e Nënë Terezës në Arkivin Shtetëror”. Manifestimin solemn e hapën nikoqiri Bedri Ziberaj, drejtor i Arkivit të Kosovës, drejtori i Arkivit Shtetëror dr.Emil Krsteski dhe për përmbajtjen e ekspozitës folën zëvendësdrejtori i Arkivit Shtetëror, prof. dr. Muzafer Bislimi dhe autorja e ekspozitës dr. Jasmina Damjanovska.
Ekspozita shkaktoi vëmendje të madhe mediatike që nga fillimi i vendosjes së saj, ku të pranishëm ishin një numër i madh nderues të figurës dhe veprës së shenjtores. Në këtë aktivitet morën pjesë ambasadorja e Republikës së Maqedonisë së Veriut në Kosovë, Shpresa Jusufi, si dhe përfaqësues të Kishës Katolike dhe shoqatës “Nënë Tereza”.
