Delegacioni i Arkivit Shtetëror, i udhëhequr nga drejtori mr. Dimitar Bogeski, mori pjesë në takimin e arkivave të shteteve pasardhëse të RSFJ-së në Sarajevë. Arkivi i Bosnjë dhe Hercegovinës ishte nikoqir i këtij takimi, në të cilin u diskutua për çështje me interes të përbashkët që lidhen me materialin arkivor dhe proceset e sukcesionit, me theks të veçantë në digjitalizimin.
Drejtoresha e Arkivit të Bosnjë dhe Hercegovinës, Danijela Mrda, theksoi se takime të tilla përfaqësojnë një mundësi të rëndësishme për avancimin e bashkëpunimit ndërmjet shteteve pasardhëse, veçanërisht në kuadër të Aneksit D të Marrëveshjes për sukcesionin, ku në fokus janë digjitalizimi i materialit arkivor dhe rritja e qasjes në të.
Si një nga projektet kyçe u veçua digjitalizimi i fondit të Presidencës së FNRJ-së, me ç’rast u arrit marrëveshje që shtetet pasardhëse të marrin kopje digjitale të materialit arkivor dhe ta përdorin atë në përputhje me nevojat e tyre.
Në kuadër të diskutimeve u hap edhe çështja e ndarjes dhe qasjes në fonde të caktuara arkivore, përfshirë edhe materialin filmik, si dhe sfidat që lidhen me mbrojtjen dhe përdorimin e tyre. U theksua se çështjet që lidhen me sukcesionin e materialit arkivor përbëjnë një proces kompleks, i cili kërkon bashkëpunim dhe mbështetje të vazhdueshme institucionale.
Pjesëmarrësit theksuan se digjitalizimi përbën një instrument kyç për sigurimin e qasjes në materialin arkivor dhe për ruajtjen e tij afatgjatë, ndërsa takime të tilla kontribuojnë në arritjen e përparimit konkret në këtë drejtim.
Takimi në Sarajevë përfaqëson një vazhdim të bashkëpunimit rajonal ndërmjet institucioneve arkivore, i orientuar drejt mbrojtjes, qasjes dhe menaxhimit bashkëkohor të trashëgimisë së përbashkët arkivore nga ish-RSFJ-ja.
